بالی وڈ اداکار شتروگھن سنہا چاقو حملے میں زخمی ہونے والے سیف علی خان اور ان کی اہلیہ کرینہ کپور کی آرٹیفشل انٹیلی جنس (اے آئی) کے ذریعے بنی تصویر پوسٹ کرنے پر تنقید کی زد میں آگئے۔
گزشتہ دنوں سیف علی خان کو ان کے گھر میں مبینہ چور نے چھری کے پے درپے وار کرکے زخمی کر دیا تھا۔
بالی وڈ اداکار کی حالت اب بہتر ہے اور آئندہ دو روز میں انہیں اسپتال سے ڈسچارج کیا جائے گا۔
فلمی شخصیات کی جانب سے سیف علی خان پر حملے کی مذمت کی جارہی ہے اور شتروگھن سنہا کو چاقو حملےکی مذمت مہنگی پڑگئی۔
بالی وڈ اداکار شتروگھن سنہا نے ایکس پر سیف پر حملے کی مذمت کی اور کہا کہ عوام سے اپیل ہے کہ الزامات لگانے کا سلسلہ روکیں پولیس اس معاملے میں اچھا کام کر رہی ہے۔
بھارتی اداکار نے ٹوئٹ میں سیف علی خان اور کرینہ کپور کی اے آئی کے ذریعے بنی تصویر بھی پوسٹ کی جس میں انہیں اسپتال کے بستر پر دکھایا گیا تھا۔
سوشل میڈیا صارفین نے اے آئی تصویر لگانے پر شتروگھن سنہا کو سخت تنقید کا نشانہ بنایا جس کے بعد انہیں تصویر ہٹانا پڑگئی۔