لاہور: پولیس نے پی ٹی آئی لاہور کے جنرل سیکریٹری زبیر نیازی اور بجاج نیازی کے گھر سے بھاری مقدار میں اسلحہ برآمد کرنے کا دعوی کیا ہے۔
ڈی آئی جی آپریشنز لاہور کیپٹن (ر) محمد سہیل چودھری کا کہنا ہے کہ زبیر نیازی کے گھر پر گزشتہ رات چھاپہ مارا ۔ چھاپے کے دوران اسلحہ برآمد کیا گیا ہے۔ ڈی آئی جی آپریشنز کے مطابق تیرہ ایس ایم جی رائفلز، تین پسٹل، چھ عدد دو سو تئیس بور گنز، دس رائفلز اور گولیاں برآمد کی گئی ہیں۔
ڈی آئی جی آپریشنز نے دعوی کیا ہے کہ یہ اسلحہ لانگ مارچ کےلیے استعمال ہوناتھا۔لانگ مارچ کو قانون کے مطابق ڈیل کریں گے۔مظاہرین سے درخواست کریں گے کہ قانون کے مطابق احتجاج کریں۔ انہوں نے کہاہے کہ ہم پوری طرح سے الرٹ ہیں۔ نقص امن کو دیکھتے ہوئے دفعہ ایک سو چوالیس نافذ کرنے کا فیصلہ کیا گیا ہے۔
Weapons recovered by punjab Lahore police from vehicles of PTI Lahore office bearers Zubair Niazi and Bajash Niazi. Case registered. This is the ugly face of the so called Long March. These are the intentions. pic.twitter.com/oGZHituEgf
— Maryam Nawaz Sharif (@MaryamNSharif) May 25, 2022
مریم نواز شریف نے بھی ٹوئٹر پر ایک پیغام میں دعوی کیا ہے کہ پنجاب لاہور پولیس نے پی ٹی آئی کے عہدیداروں زبیر نیازی اور بجاش نیازی کی گاڑیوں سے اسلحہ برآمد کیا ہے، مقدمہ درج کرلیا گیا ہے۔
مسلم لیگ ن کی نائب صدر مریم نواز کا کہنا ہے کہ یہ نام نہاد لانگ مارچ کا بدصورت چہرہ ہے یہ ارادے ہیں۔ دوسری جانب زبیر نیازی اور بجاج نیازی نے گھر سے اسلحہ بر آمد کرنے کا الزام مسترد کر دیا ہے ان کا کہنا ہے کہ اسلحہ گھر سے نہیں اسلحہ کی دکان سے اٹھایا گیا۔ اسلحہ اور دکان کی تمام دستاویزات موجود ہیں۔