ہانگ کانگ میں جاری سکسز ٹورنامنٹ میں پاکستان نے پہلے یو اے ای اور پھر اپنے روایتی حریف بھارت کو شکست دے کر کوارٹر فائنل میں جگہ بنا لی۔
گروپ سی میں پاکستان نے بھارت کو 6 وکٹوں سے ہرا دیا۔ بھارت نے پہلے بیٹنگ کرتے ہوئے مقررہ 6 اوورز میں 2 وکٹوں کے نقصان پر 119 رنز بنائے۔
بھارت کے چپلی نے 16 گیندوں پر 53 رنز بنا کر ریٹائرڈ ہو گئے، جبکہ روبن اتھاپا نے 31 رنز کی اننگز کھیلی۔ پاکستانی کپتان فہیم اشرف نے دونوں وکٹیں حاصل کیں۔
ہدف کے تعاقب میں پاکستانی ٹیم نے بغیر کسی وکٹ کے نقصان کے 120 رنز کا ہدف صرف 5 اوورز میں حاصل کر لیا۔
پاکستان کی جانب سے آصف علی نے زبردست نصف سنچری بنائی اور 14 گیندوں پر 55 رنز بنا کر ریٹائرڈ ہوئے۔ ان کی اننگز میں سات چھکے اور دو چوکے شامل تھے۔ کپتان فہیم اشرف نے 5 گیندوں پر 22 جبکہ محمد اخلاق نے 12 گیندوں پر 40 رنز کی ناقابل شکست اننگز کھیلی۔
اس سے پہلے گرین شرٹس نے اپنے پہلے گروپ میچ میں یو اے ای کو 13 رنز سے شکست دی۔
پاکستان نے پہلے بیٹنگ کرتے ہوئے بغیر کسی وکٹ کھوئے مقررہ 6 اوورز میں 128 رنز بنائے۔ آصف علی نے 14 گیندوں پر 50 اور محمد اخلاق نے 15 گیندوں پر 52 رنز کی اننگز کھیلی۔
یو اے ای کی پوری ٹیم ہدف کے تعاقب میں 115 رنز پر آؤٹ ہو گئی۔ محمد ذوہیب نے 14 گیندوں پر 53 اور خالد شاہ نے 34 رنز بنائے۔
پاکستان کے آصف علی کو دونوں میچز میں شاندار اننگز اور نصف سنچریاں بنانے پر بہترین کھلاڑی قرار دیا گیا۔
اس ٹورنامنٹ میں 12 ٹیمیں شامل ہیں: پاکستان، بھارت، نیوزی لینڈ، جنوبی افریقہ، ہانگ کانگ، یو اے ای، انگلینڈ، آسٹریلیا، نیپال، سری لنکا، بنگلہ دیش اور عمان، جنہیں چار گروپس میں تقسیم کیا گیا ہے۔ ہر گروپ کی دو بہترین ٹیمیں کوارٹر فائنل کے لیے کوالیفائی کریں گی۔
گروپ میچز آج کھیلے جا رہے ہیں، جبکہ کوارٹر فائنل کل (ہفتہ) اور سیمی فائنل اور فائنل اتوار کو ہوں گے۔