اسلام آباد: وزیراعظم کو دادو میں فیض محمد دریانی چانڈیو گاؤں میں آگ لگنے کےواقعے کی رپورٹ پیش کر دی گئی ، وفاقی حکومت کی طرف سے جاں بحق افراد کے لواحقین اور زخمیوں کی امداد کے لیے ایک کروڑ روپے جاری کر دیے گئے۔
وزیراعظم نے ضلعی انتظامیہ کو متاثرین کی بحالی تک ہر ممکن امداد فراہم رکھنے کی ہدایات جاری کی ، اس موقع پر وزیر اعظم شہباز شریف کا کہنا تھا کہ سانحےمیں جاں بحق افراد کے لواحقین کے دکھ میں پوری قوم برابر کی شریک ہے،زخمیوں کے علاج میں کسی قسم کی غفلت نہ برتی جائے۔
وزیر اعظم نے ابتدائی رپورٹ کے بعد آگ کی وجہ معلوم کرنے کی مکمل تحقیقات کی ہدایت دیں اور کہا کہ ضلعی انتظامیہ ایسے اقدامات کو یقینی بنائے کہ مستقبل میں ایسا سانحہ نہ ہو ،غفلت کا پتہ چلنے پر ذمہ داران کے خلاف کارروائی کی جائے گی۔
