ویب ڈیسک: یوکرین کے دارالحکومت کیف کے شاپنگ سینٹر پر روسی فوج کے حملے 8 افراد ہلاک اور 10 ز خمی ہوگئے ہیں۔
انتظامیہ کے مطابق شاپنگ سنٹر کے آس پاس کی عمارتیں، جن میں سکول بھی شامل ہیں شدید متاثر ہوئے ہیں، رہائشیوں کو بمباری سے ہونے والی فضائی آلودگی کے بارے میں خبردار کیا گیا ہے۔ روسی فوجی اب چار ہفتوں سے کیف پر گولہ باری کر رہے ہیں اور یوکرین کے دارالحکومت کو گھیرنے کی کوشش کر رہے ہیں، جو جنگ سے پہلے تقریباً 30 لاکھ افراد کا گھر تھا۔
یوکرین کے صدر ولادیمیر زیلنسکی نے کہا ہے کہ روس ان کے ملک کو تباہ کررہا ہے۔ انہوں نے یہ بھی کہا کہ روس خارکیف، ماریو پول اور دارالحکومت کیف پر قبضہ چاہتا ہے مگر عوام اور وہ خود کبھی ایسا نہیں کرنے دیں گے جبکہ یوکرین نے روس کی جانب سے ماریوپول شہر میں ہتھیار ڈالنے کے مطالبے کو بھی مسترد کردیا ہے۔
یوکرینی نائب وزراعظم نے کہا کہ ہتھیار ڈالنے کا تو سوال ہی پیدا نہیں ہوتا اور یہ بات روسیوں کو بتا چکے ہیں۔ یوکرین کی تجارت کے حوالے سے اہم ترین شہر ماریوپول کے رہائشی روسی محاصرے میں ہیں اور انہیں خوراک، پانی اور بجلی کی قلت کا سامنا ہے۔ روس کا کہنا تھا کہ ماریوپول شہر کا دفاع کرنے والے یوکرینی فوجیوں کو ہتھیار ڈالنے کی صورت میں محفوظ راستہ دیا جائے گا۔
