اسلام آباد: پاکستان نے بھارت کی جانب سے میزائل فائر کرنے کی انکوائری بند کرنے کا فیصلہ مسترد کر دیا ہے۔
پاکستان نے بھارتی سپر سونک میزائل فائر کرنے کے واقعے کی مشترکہ تحقیقات کا مطالبہ کیا ہے۔
اس ضمن میں ترجمان دفتر خارجہ نے کہا ہے کہ غیر ذمہ دارانہ اقدام پر افسران کوسزائیں غیر تسلی بخش، ناقص اور ناکافی ہیں۔
ترجمان دفتر خارجہ کے مطابق بھارت پاکستان کے مشترکہ انکوائری کے مطالبے کا جواب دینے میں ناکام رہا، بھارت
میزائل کمانڈ اینڈ کنٹرول سسٹم، سیفٹی اور سیکیورٹی پروٹوکول کا جواب دینے میں ناکام رہا، بھارت اسٹریٹجک ہتھیاروں کو سنبھالنے میں تکنیکی خامیوں کو انسانی غلطی کے پیچھے چھپا نہیں سکتا ہے۔
دفتر خارجہ کے ترجمان نے کہا کہ بھارت کو مشترکہ تحقیقات کے لئے پاکستان کا مطالبہ تسلیم کرنا چاہئے، 9 مارچ کو بھارت نے میزائل فائر کر کے پورے خطے کے امن و سلامتی کو خطرے میں ڈال دیا تھا۔
ترجمان دفتر خارجہ نے واضح کیا ہے کہ پاکستان کا تحمل کا مظاہرہ ذمہ دارجوہری ریاست کا ثبوت ہے۔
