اسلام آباد: نائب صدرپیپلزپارٹی سینیٹر شیری رحمان کا کورونا فنڈ میں بے ضابطگیوں کی تحقیقات کا مطالبہ کیا ہے۔ کہا کہ کورونا فنڈ میں چالیس ارب روپے سے زائد ضابطگیوں پر احتسابی ادارے خاموش کیوں ہیں۔
سینیٹر شیری رحمان نے کہا کہ چالیس ارب روپے سے زائد کی بے ضابطگیوں کا کسی اپوزیشن نے الزام نہیں لگایا، بے ضابطگیوں کی تصدیق آڈیٹر جنرل کی آڈٹ رپورٹ میں ہوئی ہے، حکومت نے کورونا فنڈ کے بارے میں پارلیمان میں کبھی جواب نہیں دیا، دوسروں کا احتساب کرنے والے شفافیت سے بھاگ رہے۔
انہوں نے کہا کہ ابھی حکومت نے آڈٹ کے لئے مکمل اخراجات کی تفصیل نہیں فراہم کی کورونا فنڈ میں کرپشن کا یہ ابھی ٹریلر ہے، پوری فلم باقی ہے، کورونا فنڈ عوام کی امانت ہے، تباہی سرکار نے کورونا فنڈ کو بھی نہیں بخشا، ہم کورونا فنڈ میں کرپشن کی مکمل تحقیقات کا مطالبہ کرتے ہیں۔
