اسلام آباد: صدارتی ریفرنس کے لیے سپریم کورٹ کا پانچ رکنی لارجر بینچ تشکیل دے دیا گیا۔
نمائندہ ہم نیوز کے مطابق چیف جسٹس عمر عطا بندیال 5 رکنی لارجر بینچ کی سربراہی کریں گے۔ بینچ میں جسٹس منیب اختر، جسٹس اعجاز الاحسن، جسٹس مظہر عالم خان اور جسٹس جمال خان مندوخیل شامل ہیں۔24 مارچ کو صدارتی ریفرنس پر سماعت ہو گی۔
گزشتہ روز سپریم کورٹ نے صدارتی ریفرنس کی سماعت کے لارجر بینچ تشکیل دینے کا فیصلہ کیا تھا اور اس سلسلے میں سیاسی جماعتوں کو نوٹسز جاری کیے گئے۔ آرٹیکل 63 اے کی تشریح کے لیے صدارتی ریفرنس سپریم کورٹ میں دائرکیا گیا۔
صدر مملکت ڈاکٹر عارف علوی نے آرٹیکل 63 اے کی تشریح کے حوالے سے آرٹیکل 186 کے تحت سپریم کورٹ میں ریفرنس دائر کرنے کی منظوری دی۔ صدر مملکت نے وزیر اعظم عمران خان کے مشورے پر سپریم کورٹ کی رائے مانگی ہے۔
