افواج پاکستان کی سیلاب سے متاثرہ افراد کی مدد کے لیئے ملک بھر امدادی کارروائیاں جاری ہیں۔ پاک بحریہ کے جوان بھی سندھ کے مختلف علاقوں میں امدادی کارروائیوں میں حصہ لے رہے ہیں۔
ترجمان پاک بحریہ کے مطابق پاک بحریہ کے جوان سندھ کے علاقوں بشمول سانگھڑ، تحصیل مہر، سلطان کوٹ، شاہ بندر، کوڈاریو، دولت پور، چوھڑجمالی، سجاول اور ٹھٹھہ میں امدادی کارروائیوں میں حصہ لے رہے ہیں۔ پاک بحریہ نے سندھ حکومت کے ساتھ ساتھ امدادی کارروائیوں کا دائرہ کار پنجاب اور خیبر پختونخوا کے سیلاب زدہ علاقوں تک بھی بڑھا دیا ہے۔ جوان کشتیوں اور ہیلی کاپٹرز کے ذریعے سیلاب زدہ علاقوں میں پھنسے افراد کو محفوظ مقامات پر منتقل کر رہے ہیں جبکہ پاک بحریہ کی جانب سے متاثرین میں راشن بیگز، تیار کھانا، صاف پانی اور دیگر ضروریات زندگی فراہم کی جارہی ہیں۔
پاک بحریہ کے ترجمان کے مطابق راجن پور، جامشورو، سانگھٹر اور ڈی آئی خان میں بھی پاکستان نیوی کے میڈیکل کیمپس کے علاوہ مختلف علاقوں میں موبائل میڈیکل ٹیمز بھی کام کر رہی ہیں۔ پاک بحریہ کے جوانوں نے سول انتظامیہ کے ساتھ مل کر ڈیرہ اسماعیل خان میں چشمہ روڈ کی عارضی مرمت کے بعد اسے عام ٹریفک کیلئے کھول دیا ہے۔ ترجمان کا یہ بھی کہنا ہے کہ پاک بحریہ مقامی انتظامیہ اور فلاحی تنظیموں کے تعاون سے تمام متاثرین کی ہر ممکن بحالی کے لیے پر عزم ہے۔