سابق صدر مملکت اور پاکستان پیپلز پارٹی پارلیمنٹیرنز کے صدر آصف علی زرداری کا کہنا ہے کہ ایک شخص اداروں کو دھمکیاں دیتا ہے اور کہتا ہے گرفتار کر کے دکھاؤ۔
کراچی بلاول ہاؤس میں سندھ کے وزرا نے آصف علی زرداری سے ملاقات کی جس میں بارشوں کے بعد صوبے میں سیلاب کی صورتحال اور ملک کے سیاسی حالات پر بات کی گئی اس موقع پر آصف زرداری نے کہا کہ بارش کے باعث پورے ملک میں ہنگامی صورتحال ہے، چاروں صوبوں میں متاثرین کی نگاہیں ہماری طرف ہیں، ہمیں سیاست چھوڑ کر اپنے متاثرہ بہن بھائیوں پر توجہ دینی چاہیے۔
سابق صدر مملکت نے کہا کہ ایک شخص کو اقتدار کا نشہ پاگل کر رہا ہے، یہ شخص ہر روز ہماری فوج پر تنقید کر رہا ہے، اسی فوج کےافسراورسپاہی دہشت گردوں سے جنگ لڑرہے ہیں. آصف علی زرداری نے کہا کہ یہ شخص عدلیہ کی ایک خاتون مجسٹریٹ کو دھمکیاں دیتا ہے، کہتا ہے کہ مھجے گرفتار کرکے دکھاؤ، عدلیہ کو دیکھنا ہوگا کہ کیا یہ شخص قانون سےبالاترہے۔
انہوں نے مزید کہا کہ کیا یہ شخص میرے،میاں نواز شریف، میری بہن اور مریم نواز کے خلاف ماروائے قانون انتقامی کاروائیاں کرسکتا ہے، کیایہ شخص ہر قانون کو روند سکتا ہے۔ اداروں اورحکومت کو اپنی رٹ قائم کرنی پڑے گی ورنہ قانون، آئین اور ادارے اس شخص کی ہوس چڑھتے رہیں گے۔