اسلام آباد: آرمی چیف جنرل قمر جاوید باجوہ کی زیرصدارت کور کمانڈرز کانفرنس میں داخلی و علاقائی سیکیورٹی صورتحال اور پیشہ ورانہ امور پر تبادلہ خیال کیا گیا ۔
ڈی جی آئی ایس پی آر میجر جنرل بابر افتخار کے مطابق آرمی چیف جنرل قمر جاوید باجوہ کی زیر صدارت 248ویں کور کمانڈرز کانفرنس جی ایچ کیو راولپنڈی میں منعقد ہوئی۔ کانفرنس میں داخلی، علاقائی اور عالمی سیکیورٹی صورتحال اور پیش رفت پر تبادلہ خیال کیا گیا جبکہ پیشہ ورانہ امور سمیت مغربی سرحدوں پر مینجمنٹ کے امور پر بھی بات چیت کی گئی۔
کانفرنس کے شرکاء نے اجلاس میں بھارتی میزائل کےحالیہ واقعے پر گہری تشویش کا اظہار کرتے ہوئے قرار دیا کہ میزائل واقعہ ایک بہت بڑا حادثہ بن سکتا تھا۔شرکاء نے زور دیا کہ بھارت کے غلطی تسلیم کرنے کے باوجود متعلقہ عالمی فورمز کو صورتحال کا نوٹس لینا چاہئے اور بھارت کے اسٹریٹجک اثاثوں کے حفاظتی اور سیکیورٹی پروٹوکول پر نظر رکھی جائے۔ ایسے خطرناک واقعات خطے میں امن و استحکام کو خطرے میں ڈال سکتے ہیں۔
آرمی چیف نے انسداد دہشت گردی کے جاری کامیاب آپریشنز کو سراہا جبکہ شرکاء نے عزم دہرایا کہ ملک میں سیکیورٹی یقینی بنانے کیلئے تمام اقدامات اٹھائے جائیں گے۔آرمی چیف نے او آئی سی وزرائے خارجہ اجلاس اور یوم پاکستان پریڈ کے پرامن انعقاد کو یقینی بنانے کیلئے ہر ممکن سیکیورٹی اقدامات کی ہدایت کی۔ آرمی چیف نے فارمیشنز کی تربیت پر مرکوز آپریشنل تیاریوں کو بھی سراہا ۔
