پشاور: مسجد قاسم علی خان کے اعلان پر خیبر پختونخوا میں سرکاری سطح پر آج عید منائی جا رہی ہے۔ نماز عید کا اجتماع عیدگاہ چارسدہ روڈ پر ہوا۔ وزیر اعلی محمود خان نے گورنر ہاؤس میں نماز عید ادا کی۔
پشاور سمیت خیبر پختونخوا کے مختلف شہروں میں مسجد قاسم علی خان میں سو سے زائد شہادتوں کی بنیاد پر آج پیر کو سرکاری سطح پر عید منائی جا رہی ہے۔پشاور میں نماز عید کا سب سے بڑا اجتماع عید گاہ چارسدہ روڈ پر ہواجس میں بڑی تعداد میں شہریوں نے شرکت کی۔
وزیر اعلیٰ خیبر پختونخوا محمود خان سمیت صوبائی وزرا نے نماز عید گورنر ہاوس میں ادا کی۔نماز عید میں ملکی سالمیت اور استحکام کے لیے خصوصی دعائیں کی گئی۔نماز کے بعد ایک دوسرے کو عید کی مبارکباد دی گئی۔ پشاور میں گزشتہ شام ہونے والے زونل رویت ہلال کمیٹی کے علما نے بھی آج عید منانے کا اعلان کیا تھا۔