کراچی: گورنر سندھ عمران اسماعیل کی قیادت میں پی ٹی آئی کے وفد نے ایم کیو ایم رابطہ کمیٹی سے بہادر آباد میں ملاقات کی۔ ملاقات میں تحریک عدم اعتماد سے متعلق مشاورت کی گئی۔ اور ملک کی موجودہ سیاسی صورتحال پر تبادلہ خیال کیا گیا۔
ملاقات کے بعد میڈیا سے گفتگو کرتے ہوئے گورنر سندھ عمران اسماعیل کا کہنا تھا کہ ایم کیو ایم سے تحریک عدم اعتماد کے خلاف براہ راست حمایت کی درخواست کی ہے۔ انہوں نے دعوی کیا کہ ہمارے اتحادی ہمارے ساتھ رہے تو عدم اعتماد کی تحریک ناکام ہوگی۔
ایم کیو ایم رہنما خالد مقبول صدیقی نے واضح کیا کہ نئی سیاسی صورتحال پر حزب اختلاف نے رابطہ کیا ہے تاہم تحریک عدم اعتماد کے معاملے پر حتمی فیصلہ کارکنان کے اجلاس میں کریں گے۔
خالد مقبول صدیقی نے باور کرایا کہ حکومتیں تبدیل ہوتی رہتی ہیں۔ جمہوریت ڈی ریل نہیں ہونی چاہئے۔
