اسلام آباد: وزیر خارجہ بلاول بھٹو زرداری نے کہا ہے کہ عمران حکومت کیخلاف بیرونی نہیں جمہوری سازش کی گئی ہے۔ انہیں امریکا نے نہیں بلاول ہاؤس نے سازش سے ہٹایا۔
صحافیوں سے غیر رسمی بات چیت کرتے ہوئے بلاول بھٹو زرداری نے کہاکہ پاکستان پیپلزپارٹی نے اپوزیشن کو ایک پیج پر لانے اور عمران خان کو ہٹانے کے لئے تین سال کوشش کی۔ تحریک عدم اعتماد لائے اور کامیاب ہوئے ۔ عمران خان کو مسائل اور مشکلات کا پتہ ہے اور اس کی ناکامی کا بھی اسے علم ہے۔
وزیر خارجہ نے کہاکہ عمران خان اپنی کارکردگی کی وجہ سے اپنے عہدے سے ہٹے اور اپنی ناکامی چھپانے کے لئے عدلیہ اور اسٹیبلشمنٹ پر حملے کر رہے ہیں۔ عمران خان کو سمجھنا چاہیے کہ وہ حکومت میں نہیں اور اکثریت ہمارے پاس ہے۔
وزیر خارجہ نے عمران خان سے کہاکہ وہ پارلیمنٹ واپس آئیں اور اپوزیشن لیڈر کا کردار ادا کریں۔
