اسلام آباد: وزیراعظم عمران خان کا کہنا ہے کہ مسلم لیگ (ن) کے صدر شہباز شریف کے خلاف کرپشن کے اوپن اینڈ شٹ کیسز ہیں۔ انکی کرپشن پر خاموش رہنا جرم ہے۔
وزیراعظم عمران خان کی زیر صدارت پارٹی رہنماؤں اور ترجمانوں کا اجلاس ہوا جس میں وزیراعظم کے دورہ چین پر تفصیلی بریفنگ دی گئی۔ ذرائع نے بتایا کہ وفاق وزیر منصوبہ بندی اسد عمر اور معاون خصوصی سی پیک خالد منصور نے بریفنگ دی۔
اجلاس سے خطاب میں وزیر اعظم عمران خان نے کہا کہ مسلم لیگ (ن) کے صدر شہباز شریف کے خلاف کرپشن کے اوپن اینڈ شٹ کیسز ہیں، انکی کرپشن پر خاموش رہنا جرم ہے۔جس جس نے ملک کا پیسہ لوٹا بے نقاب کرتے رہیں گے۔
عمران خان نے کہا کہ عالمی امور پر پاکستان کے مؤقف کو پزیرائی مل رہی ہے۔یہ دورہ چین تاریخی اور گزشتہ دوروں سے مختلف تھا۔انہوں نے امید ظاہر کی کہ چینی قیادت کے ساتھ ملاقاتیں کامیاب رہیں جن کا پاکستان کو فائدہ ہو گا۔
وزیر اعظم عمران خان نے کہا کہ چین سیاسی اور جغرافیائی امور پر پاکستان کے ساتھ کھڑا ہے۔ چین پاکستان کی صنعتی ترقی میں اہم کردار ادا کرنے جا رہا ہے۔ چین نے مسئلہ کشمیر اور افغانستان کے معاملہ پرپاکستان کے مؤقف کی تائید کی ہے۔
