لاہور: پنجاب میں وزارت اعلیٰ کے قلمدان کیلئے جوڑ توڑ کی سیاست عروج کو پہنچ گئی۔چوہدری مونس الہی اپنے والد چوہدری پرویز الہی کی کامیابی کیلئے متحرک ہو گئے جبکہ دوسری جانب جہانگیر ترین گروپ اور علیم خان گروپ نے بھی آئندہ کے لائحہ عمل کیلئے اپنے اپنے اجلاس طلب کر لیے۔
وزیراعظم کی جانب سے چوہدری پرویز الہی کو وزارت اعلیٰ کا امیدوار نامزد کرنے کے بعد سیاسی ہل چل میں مزید اضافہ ہوگیا۔ذرائع کے مطابق جہانگیر ترین گروپ کی جانب سے چوہدری پرویز الہی کی حمایت کاامکان ہےتاہم اسکا حتمی فیصلہ ترین گروپ کے اجلاس میں کیا جائے گا۔
دوسری جانب عبدالعلیم خان گروپ کے بعض اراکین نے پرویز الہی کو نامزد کرنے کے فیصلے کی مخالفت کی ہےجس کے بعد مسلم لیگ نون اور قاف لیگ کی جانب سے عبدالعلیم خان گروپ کے اراکین سے رابطہ کیا گیا ہے۔
ذرائع کے مطابق چوہدری پرویز الہی گروپ نے علیم خان گروپ کے ترجمان میاں خالد محمود سے رابطہ کیا ہے۔ میاں خالد محمود نےکہا وہ تمام دوستوں سے صلاح مشورے کے بعد جواب دیں گے۔