اسلام آباد: ضمنی انتخابات میں دھاندلی کے الزامات عمران خان کا اپنی شکست کا پیشگی اعتراف ہے۔ وزیراطلاعات مریم اورنگزیب کہتی ہیں عمران خان وزیراعظم ہوکر الیکشن کمشن کے قانون، احکامات اور ضابطوں کی دھجیاں اڑاتے رہے آج بھی الیکشن کمیشن پر ہر روز حملے کررہے ہیں۔
اپنے بیان میں سابق وزیراعظم عمران خان پر تنقید کرتے ہوئے وزیراطلاعات مریم اورنگزیب نے کہا کہ عمران خان کے وزرا نے حکومت میں ہوتے ہوئے کھلم کھلا الیکشن کمیشن کے قانون کی خلاف ورزی کی اور الیکشن کمیشن کو دھمکیاں دیں اورآج بھی یہ الیکشن چور الیکشن کمیشن پہ ہر روز حملے کررہے ہیں۔
مریم اورنگزیب کا کہنا تھا کہ عمران خان ووٹ چور ہیں، ووٹ کا محافظ بننے کی اداکاری نہ کریں ابھی ضمنی الیکشن ہوئے نہیں اور ان کا ماتم شروع ہو گیا ہے وزیراطلاعات نے کہا کہ وزرا نے الیکشن کمشن کے احکامات اور قانون کی پاسداری کے احترام میں استعفے دئیے، عمران خان لاڈلا بننے کی کوشش میں قانون اور ضابطے کے سامنے سر جھکانے کو تیار نہیں عمران خود کو قانون سمجھتے ہیں، وہ اپنے آپ کو قانون کے تابع نہیں سمجھتے۔
