عمران خان کی چٹھی حلال اور چوہدری شجاعت کی حرام ہے،مریم اورنگزیب

اسلام آباد: وزیراطلاعات مریم اورنگزیب نے کہا ہے کہ سوال یہ ہے کہ فل کورٹ کیوں نہیں؟ سوال یہ ہے کہ ایک جیسے خط پر دو الگ الگ فیصلے کیوں ؟ یہ کیسا انصاف ہے کہ عمران خان کی چٹھی حلال اور چوہدری شجاعت کی حرام ہے ۔ آئین شکن عمران خان کے خط پر پچیس منحرف ارکان کو ووٹ ڈالنے کی اجازت نہیں، یہ ارکان ڈی سیٹ بھی ہوگئے اور ووٹ بھی نہیں گنا گیا۔

اپنے بیان میں وزیراطلاعات مریم اورنگزیب نے کہا کہ عمران خان اور چوہدری شجاعت کے ایک جیسے خطوط پر الگ الگ تشریح کیوں؟ آئین شکن عمران خان کے خط پر پچیس منحرف ارکان کو ووٹ ڈالنے کی اجازت نہیں اور وہ ڈی سیٹ بھی ہوگئے اور ووٹ بھی نہیں گنا گیا۔

وزیراطلاعات مریم اورنگزیب نے کہا کہ 3 اپریل کو عمران خان کے بطور پارٹی سربراہ خط کی تشریح اوربائیس جولائی کو چوہدری شجاعت کے بطور پارٹی سربراہ خط کی تشریح میں فرق کیوں؟ یہ کیسا انصاف ہے کہ عمران خان کاخط حلال اور چوہدری شجاعت حسین کی حرام ہے۔ انہوں نے کہا کہ مسئلہ اب پنجاب میں کسی کی حکومت کا نہیں ہے ، مسئلہ اب آئین اور انصاف کا ہے۔