اسلام آباد: مسلم لیگ نون کے رہنما مفتاح اسماعیل نےکہا ہے کہ پی ٹی آئی کی نااہل اور کرپٹ حکومت نے بجلی کے شعبے کے نقصانات میں اضافہ کیا۔
حماد اظہر کے بیان پر مفتاح اسماعیل نے کہا کہ مسلم لیگ نون کی حکومت نے بجلی کی ترسیل اور تقسیم کے نظام کو بہتر بنانے کا کام شروع کیاتھا جسے پی ٹی آئی نے بند کیا، مسلم لیگ نون بجلی کی ترسیل اور تقسیم کے نقصانات ایک بار پھر کم کرکے دکھائے گی، پی ٹی آئی والے ملک میں بجلی کے زیادہ کارخانے ہونے کا جھوٹ بول رہے ہیں، کارخانے زیادہ ہیں تو پاکستان میں بجلی کی قلت اور اندھیرے کیوں ہیں۔
مفتاح اسمعیل نے کہا کہ پلانٹس کے کرایوں پر اعتراض مضحکہ خیز ہے مکان کرایہ پر لیں تو اس میں رہیں یا نہ رہیں کرایہ دینا پڑتا ہے، عمران خان کو زندگی بھر مفت کھانے کی عادت ہے، اُن کا خیال ہے کہ کوئی پلانٹ بھی مفت آکر لگا دے گا۔