اسلام آباد:وفاقی وزیر برائے منصوبہ بندی اسد عمر کا کہنا ہے کہ ملکی سیاست کو حرام کے پیسے سے پاک کرنا چاہتے ہیں۔ایسا پاکستان چاہتے ہیں جہاں عوام کے پیسے میں خیانت کرنے کی کسی کی ہمت نہ ہو۔
اسلام آباد میں میڈیا سے گفتگو کرتے ہوئے وفاقی وزیر اسد عمر نے کہا کہ عمران خان کے خلاف تحریک عدم اعتماد ناکام ہوگی۔ ٹی وی پر احمد حسین ڈیہر کا پیغام سنا امید ہے باقی بھی واپس آجائیں گے۔انہوں نے کہا کہ 27 تاریخ کو ملک میں تاریخ رقم ہوگی۔ پوری دنیا کی نظریں پریڈ ایونیو پر ہوں گی۔
اسد عمر نے کہا کہ وزیراعظم نے ایک قرارداد پیش کی جس کو تمام مسلم ممالک نے سپورٹ کیا۔ اقوام متحدہ نے قرارداد پر فیصلہ کیا 15 مارچ کا دن اسلامو فوبیا کیخلاف منایا جائے گا۔ وزیراعظم نے اسلامو فوبیا کے خلاف آواز بلند کی۔ میں تمام پاکستانیوں کو مبارک باد دینا چاہتا ہوں کہ عالمی فتح ہوئی۔عمران خان نے مسلمانوں کا مقدمہ جس طرح لڑا فخر محسوس ہوتا ہے۔
اسد عمر نے کہا کہ بدقسمتی سے ہمارے حکمرانوں کی اربوں ڈالرز کی جائیدادیں باہر ہیں۔ جن کی جائیدادیں باہر ہوں ایسے حکمران کیا خاک مسلمانوں کا مقدمہ لڑیں گے۔انہوں نے کہا کہ اپنی ذات کے لیے نہیں ملک کے لیے کچھ کریں تو ملک میں بہت صلاحیت ہے۔