اسلام آباد: پی ٹی آئی کے رہنما فواد چوہدری نے کہا ہے کہ بھٹو کا نواسہ شہباز شریف کا وزیر خارجہ بن گیا اور اب پیپلز پارٹی اصل میں ن لیگ میں شامل ہو گئی ہے۔
سابق وفاقی وزیر اطلاعات فواد چوہدری نے پریس کانفرنس کرتے ہوئے کہا کہ عوامی دباؤ کی وجہ سے ان کو دورہ سعودی عرب پر یوٹرن لینا پڑا اور اگر عوامی دباؤ پر فیصلہ واپس نہ لیا جاتا تو ملک کا بہت معاشی نقصان ہوتا۔ ان کےعمرے کے وفد میں 3 مالشیے بھی شامل تھے۔
انہوں نے کہا کہ امپورٹڈ کوئلہ مہنگا ہو گیا کیونکہ انہوں نےادائیگی نہیں کی اس لیے لوڈشیڈنگ ہے۔ ان کے ایل این جی کے 2 بڑے سودے ڈیفالٹ کر گئے ہیں۔ تحریک انصاف 10 سالہ تاریخ کا سب سے بڑا ذخیرہ چھوڑ کر گئی تھی۔ پاکستان میں بجلی اور ڈیزل کا بہت بڑا بحران پیدا ہوچکا ہے جبکہ فصل پک چکی ہے اور کسانوں کو ڈیزل نہیں مل رہا۔ بجلی اور ڈیزل کا بحران ان کی بدانتظامی کی وجہ سے ہوا ہے اور توانائی کا ان کے پاس وزیر ہی نہیں۔
