لاہور: اسپیکر چوہدری پرویز الہیٰ نے پنجاب اسمبلی میں ہنگامہ آرائی کے دوران تشدد کا نشانہ بنانے کے معاملے پر حمزہ شہباز کے خلاف اندراج مقدمہ کے لئے سیشن عدالت سے رجوع کرلیا۔ عدالت نے ایس ایچ او تھانہ قلعہ گجر سنگھ سے پچیس اپریل کو واقعہ کی رپورٹ طلب کرلی۔
پنجاب اسمبلی میں ہنگامہ آرائی اور چوہدری پرویز الہیٰ کو تشدد کا نشانہ بنانے کا معاملہ عدالت پہنچ گیا۔ اسپیکر پنجاب اسمبلی چوہدری پرویز الہیٰ نے اندراج مقدمہ کے لئے سیشن عدالت سے رجوع کرلیا۔ چوہدری پرویز الہیٰ کی جانب سے عامر سعید راں ایڈووکیٹ نے درخواست دائر کی جس میں حمزہ شہباز سمیت لیگی ایم پی ایز، آئی جی پنجاب، ایس ایس پی اور دو سو نامعلوم افراد کے خلاف مقدمہ درج کرنے کی استدعا کی گئی۔
درخواستگزار نے موقف اپنایا کہ ہم نے متعلقہ تھانے میں حمزہ شہباز سمیت دیگر کے خلاف اندراج مقدمہ کی درخواست دائر کی مگر پولیس ہماری درخواست پر کارروائی کرنے سے گریزاں ہے۔ درخواستگزار نے استدعا کی کہ عدالت پولیس کو اندراج مقدمہ کا حکم جاری کرے۔ ایڈیشنل سیشن جج حافظ محمد رضوان عزیز نے چوہدری پرویز الہیٰ کی درخواست پر ایس ایچ او تھانہ قلعہ گجر سنگھ سے پچیس اپریل کو واقعہ کی رپورٹ طلب کرلی۔
