اسلام آباد: پیپلز پارٹی پارلیمنٹیرینز کی مرکزی سیکرٹری اطلاعات شازیہ مری نے سانحہ مری پر سامنے آنے والی رپورٹ کو مسترد کردیا۔ شازیہ مری کا کہنا ہے کہ اپنی نااہلی کے ثبوتوں کو وزیراعلیٰ پنجاب ایسے وصول کررہے ہیں جیسے کوئی تمغہ لے رہے ہوں۔
اسلام آباد میں پریس کانفرنس کے دوران شازیہ مری نے لاہور بم دھماکے کی مذمت کی اور لواحقین سے اظہار تعزیت کرتے ہوئے کہا کہ نیشنل سکیورٹی پالیسی جب تک پارلیمنٹ میں پیش نہیں ہوگی حمایت یا مخالفت نہیں کرسکتے اور اسی خفیہ پالیسی کا نتیجہ ہے کہ آج بھی ملک دہشت گردی کا شکار ہے۔
شازیہ مری نے کہا کہ پیپلزپارٹی کی جانب سے کل وفاقی حکومت کی کسان دشمن پالیسیوں کیے خلاف ساہیوال سے کسان ریلی نکالی جائے گی۔
شازیہ مری نے کہا کہ 1973ء کا آئین متفقہ آئین ہے۔ صدارتی نظام کی بحث بھونڈا مذاق ہے ۔صدارتی نظام کی آئین میں کوئی گنجائش ہے نہ کسی کو تجربہ کرنے دینگے۔اگر کسی کو شوق ہے تو پارلیمنٹ میں آکر اس معاملے کو زیر بحث لائیں۔ یہ ڈرامے بند کئے جائیں۔