لاہور: وزیراعظم میاں شہباز شریف نے کہا ہے کہ عوام کو صحت کی سہولت فراہم کرنا حکومت کی اولین ترجیح ہے۔ جبکہ اس کو ن لیگ کے نام کی وجہ سے تباہ کرنا افسوس کی بات ہے۔
وزیراعظم شہباز شریف نے پاکستان کڈنی اور لیور ٹرانسپلانٹ انسٹیٹیوٹ لاہور میں میڈیا سے گفتگو کرتے ہوئے کہا کہ پاکستان کڈنی اور لیور ٹرانسپلانٹ انسٹیٹیوٹ میں بلا تفریق سب کا علاج ہو سکتا ہے۔ یہاں پر بیس یونٹ ہیں جن میں سے 16 کام کر رہے ہیں۔ پچھلے مہینے علاج کے لیے سترہ لوگ وہ آئے ہیں جن کے پاس علاج کے پیسے نہیں تھے۔ یہاں پر پورے پاکستان سے آئے ہوئے لوگوں کا علاج ہو رہا ہے۔ مستحق مریضوں کا فری علاج ہو گا۔
انہوں نے کہا کہ بطور خادم پنجاب اربوں روپے غریبوں کے علاج کے لیے لگائے۔ رات دن کی محنت سے کم عرصے میں یہ ہسپتال بنا ہے۔ نیب بیس ارب میں سے بیس پیسے کی کرپشن نہیں نکال سکا۔
وزیراعظم کا کہنا تھا کہ میں نے کراچی کے ایک صاحب حیثیت سے نو کروڑ لے کر اس ہسپتال کے لیے مشینری باہر سے منگوائی ہے۔ میں نے انتظامیہ کو ہدایت کی ہے تمام تر اقدامات کئیے جائیں جس سے مریضوں کو سہولیات مل سکیں۔
