کراچی: وزیر اطلاعات سندھ سعید غنی کا کہنا ہے کہ حکومت جارہی ہے اور یہ لوگ بوکھلاہٹ کا شکار ہیں، ان لوگوں نے معیشت کا جنازہ نکال دیا ہے جسے ٹھیک کرنا آسان کام نہیں ہوگا ، سعید غنی کا کہنا تھا کہ کسی ملک کا صدر انہیں فون تک نہیں کرتا ، روس نے بلا لیا اس لیے یہ دورہ کامیاب تھا، دورے میں نا تو کوئی معاہدہ ہوا نا مفاہمتی یادداشت۔
کراچی میں پریس کانفرنس کرتے ہوئے صوبائی وزیر اطلاعات سعید غنی نے کہا کہ حکومت نے معیشت کا جنازہ نکال دیا ہے، ان کے بعد معاملات ٹھیک کرنا آسان نہیں ہوگا، تاہم پیپلز پارٹی نے ماضی میں بھی بحرانی صورتحال پر قابو پایا ہے اب بھی بہتری لائیں گے ۔سعید غنی نے وزیر اعظم کے دورہ روس پر بات کرتے ہوئے کہا کہ کسی ملک کا صدر انہیں فون تک نہیں کرتا ، روس نے بلا لیا اس لیے دورہ کامیاب تھا ۔
صوبائی وزیر اطلاعات کا کہنا تھا کہ مخالف جماعتوں چاہتی ہیں کہ کوئی جھگڑا ہو، یہ لوگ لسانی فسادات کے زریعہ اپنی سیاسی دکانیں چمکانا چاہتی ہیں ،انہوں نے عوام سے اپیل کی کہ لانگ مارچ میں شریک ہوکر بلاول بھٹو زرداری کے بازو بنیں۔
