سندھ میں بارشوں اور سیلاب سے ہونے والے نقصانات کی تفصیلات سامنے آگئیں۔ سندھ میں آٹھ سو ساٹھ ارب کا نقصان ہوا ہے۔
وزیراطلاعات سندھ شرجیل انعام میمن نے کہا ہے کہ ابتدائی تخمینہ کے مطابق سندھ میں آٹھ سو ساٹھ ارب روپے کا نقصان ہوا ہے۔ پندرہ لاکھ مکانات متاثر اور گیارہ ہزار سے زائد مویشی ہلاک ہوئے۔ اکتیس لاکھ اکہتر ہزار سے زائد ایکڑ اراضی پر فصلیں تباہ ہوئیں۔ دو ہزار سے زائد کلومیٹر پر مشتمل پانچ سو ستر سڑکیں متاثر ہوئی ہیں۔
کراچی کے نقصانات کا تخمینہ پچاس ارب روپے سے زائد لگایا گیا ہے۔ شرجیل میمن نے کہا ہے کہ مکانات کے نقصانات اور فصلوں کے معاوضے کی منظوری دی جائے گی۔ سندھ حکومت زرعی قرضوں پر سود کی معافی اور کم از کم ایک سال کے لیے موخر کرنے کے لیے اقدامات کرے گی۔ کسانوں کو مشینری اور دیگر سامان پر سبسڈی فراہم کی جائے گی۔
