اسلام آباد : پاکستان پیپلزپارٹی نے پارلیمان کے مشترکہ اجلاس کے مؤخر کرنے کو حکومت کی بزدلی قرار دے دیا۔
پاکستان پیپلزپارٹی کی مرکزی سیکریٹری اطلاعات شازیہ مری نے پارلیمان کے مشترکہ اجلاس سے بھاگنے پر حکومت کو کڑی تنقید کا نشانہ بناتے ہوئے کہا کہ اپنی شکست دیکھ کر حکومت نے پارلیمان کا مشترکہ اجلاس مؤخر کرکے راہِ فرار اختیار کرلی۔
شازیہ مری نے کہا پارلیمان میں دو مرتبہ عددی اعتبار سے شکست کے بعد حکومت کا پارلیمان کے مشترکہ اجلاس سے بھاگنا بوکھلاہٹ کا ثبوت ہے، وزیراعظم پارلیمان میں اپنی اہمیت کھوچکے ہیں، حکومتی اراکین تک کی مکمل حمایت عمران خان کو دستیاب نہیں ہے۔
انہوں نے کہا پی ٹی آئی کے اراکین پارلیمان خود حکومت سے بیزار ہوچکے ہیں، اب عمران خان کا چل چلاؤ ہے۔ عمران خان نہ عوام کا سامنا کرسکتے ہیں اور نہ پارلیمان میں عوامی نمائندوں کا۔