وزیراعظم شہباز شریف نے سیلاب متاثرین کو امداد کی فراہمی میں شفافیت کیلئے فلڈ ریلیف فنڈ کے آڈٹ کا اعلان کر دیا۔
وزیراعظم محمد شہباز شریف نے اپنے ایک ٹویٹر پیغام میں کہا ہے کہ فلڈ ریلیف فنڈ کا عالمی معیار کے مطابق مکمل آڈٹ کیا جائے گا۔ انہوں نے کہا کہ فلڈ ریلیف فنڈ کا آڈٹ اے جی پی آر اور عالمی معیار کی آڈٹ فرم سے کرایا جائے گا۔
وزیراعظم محمد شہبازشریف کا کہنا تھا کہ فنڈ کیلئے ملنے والی اور جاری ہونیوالی تمام رقوم کا مکمل طور پرآڈٹ کیا جائے گا۔ اس ضمن میں آڈٹ رپورٹ کو عوام کے سامنے بھی لایا جائے گا۔ اپنے ٹویٹر پیغام میں وزیراعظم نے چین کی جانب سے سیلاب متاثرین کیلئے امداد بڑھانے پر چیننی صدر کا شکریہ ادا کرتے ہوئے کہا کہ چین کی طرف سے سو ملین یوآن کو بڑھا کر چارسو ملین کرنے پر چینی صدر کے شکرگزار ہیں۔
وزیراعظم نے کہا چین کی امداد دونوں ملکوں کے درمیان منفرد تعلقات کی عکاس ہےجبکہ چینی امداد سے سیلاب متاثرین کی مشکلات آسان ہوں گی۔
