اسلام آباد: شہباز شریف نے وزیراعظم عمران خان کے خطاب کو اعتراف شکست قرار دے دیا۔ کہا کہ عمران صاحب آپ مہنگائی بڑھانے، سی پیک روکنے اور پاکستان کی معاشی خود مختاری آئی ایم ایف کے حوالے کرنے آئے تھے۔
اپنے بیان میں صدر مسلم لیگ ن شہباز شریف کا کہنا تھا کہ عمران صاحب آپ واقعی آلو ٹماٹر کی قیمت ٹھیک کرنے نہیں آئے تھے بلکہ ملک اور عوام کا کباڑہ کرنے آئے تھے۔ آپ نے یہ کام پورا کرلیا ہے۔ اب گھر جائیں۔ آپ تو سقوط کشمیر، سی پیک کو روکنے، کرپشن میں پاکستان کے چوبیس درجے بڑھانے آئے تھے۔ یہ تباہی آپ نے کر دی ہے اب گھر جائیں۔
شہباز شریف کا کہنا تھا کہ کہ آپ نے پاکستان کے دوستوں کو ناراض کرنے آئے تھے۔ وہ ایجنڈا آپ نے پورا کردیا۔ عمران صاحب آپ پاکستان کی معاشی خود مختاری آئی ایم ایف کے حوالے کرنے آئے تھے۔ وہ ایجنڈا آپ نے پورا کر دیا۔ آپ ڈالر کی قیمت ایک سو پچیس سے ایک سو اسی کرنے آئے تھے۔ معیشت کی یہ تباہی آپ نے پوری کامیابی سے کر دی ہے۔
قائد حزب اختلاف کا کہنا تھا کہ فارن فنڈنگ کی کالی دولت کی مدد سے جو گند ڈالنے آئے تھے۔ وہ آپ پھیلا چکے۔ اس گندگی جو صاف کرنے کا وقت آگیا ہے۔ آپ نے پاکستان کی چھ فیصد گروتھ روکنے اور کم ترین تین فیصد مہنگائی کو تاریخ کی بلند ترین چھبیس فیصد پر لے جانے کا ایجنڈا پورا کردیا۔
شہباز شریف کا مزید کہنا تھا کہ آپ نے اپنا بنی گالہ کا غیرقانونی محل، حرام دولت حلال کرنے کی سکیمیں دینے آئے تھے۔ اس میں آپ پوری طرح کامیاب رہے۔ آپ اخلاقیات کا جنازہ نکالنے آئے تھے وہ آپ کر چکے ہیں۔ عمران صاحب آپ کا کام پورا ہوگیا۔ اب گھر جائیں اور مہنگائی، بے روزگای اور معاشی تباہی کی ماری قوم کو سکھ کا سانس آنے دیں۔