اسلام آباد: نیب ترمیمی آرڈیننس حکومت کی بد نیتی کا نیا ثبوت ہے، نائب صدر پیپلز پارٹی سینیٹر شیری رحمان کا کہنا ہے کہ اپوزیشن جماعتیں ریلیف کی بجائے انصاف مانگ رہی ہیں۔
ایک بیان میں شیری رحمان نے کہا کہ آصف علی زرداری نے کبھی آمروں سے ریلیف نہیں مانگا،تباہی سرکار کس غلط فہمی کا شکار ہے،گزشتہ نیب آرڈیننس حکومت کو ریلیف دینے کے لئے تھا، یہ ترمیمی آرڈیننس اپوزیشن کو ٹارگٹ کرنے کے لئے ہے۔
شیری رحمان نے کہا کہ اس حکومت کے کرپشن اور فراڈ کیسز پر نیب کیوں خاموش ہے،بی آر ٹی، چینی اسکینڈل، بلین ٹری اسکینڈل، ایل این جی اور دیگر کیسز میں نیب نے کسے گرفتار کیا ہے، کابینہ اور وزیراعظم کے دوست احباب کو نیب سے استثناء حاصل ہے حکومت سکیورٹی اداروں کے ساتھ نہیں، نیب کے ساتھ ایک پیج پر رہے۔