وفاقی وزیر برائے ماحولیاتی تبدیلی سینیٹر شیری رحمان کی عمران خان پر تنقید کہتی ہیں عمران خان کے پی اور پنجاب میں سیلاب زدگان کی جان و مال بچانے کے بجائے اپنی سیاست بچانے میں لگے ہوئے ہیں۔
وفاقی وزیربرائے ماحولیاتی تبدیلی سینیٹر شیری رحمان نے پی ٹی آئی چئیرمین عمران خان کو شدید تنقید کا نشانہ بنا ڈالا ان کا کہنا تھا کہ ملک بھر میں بارشوں اور سیلاب کی تباہ کاریوں میں 9 سو سے زائد افراد جاں بحق ہوئے ہیں۔ ملک کا کوئی ایس حصہ نہیں جو بارشوں اور سیلاب کی زد میں نا ہو مگر افسوس ہے کہ اس صورتحال کے باوجود خیبر پختون اور پنجاب میں سیلاب زدگان کی مدد کے بجائے عمران خان نے کل ہری پور میں جلسہ کیا۔ کیا عمران خان کو پورے ملک میں سیلاب نظر نہیں آ رہا؟۔
شیری رحمان نے کہا کہ ایک طرف پورا ملک ڈوب رہا، کروڑوں لوگ متاثر ہوئے ہیں دوسری طرف عمران خان لوگوں کو کہہ رہے کہ “آخری کال” کے لئے تیار رہیں۔ کیا یہ احتجاج اور مظاہروں کا وقت ہے؟۔ احتجاج کے لئے عوام کا سمندر نکالنے کا اعلان کرنے والے کو لاکھوں بے گھر سیلاب متاثرین نظر نہیں آ رہے؟ پورا ملک ڈوب جائے ان کو صرف اپنی سیاست بچانی ہے۔
