وزیر برائے ماحولیاتی تبدیلی سینیٹر شیری رحمان نےکہا ہےکہ عمران خان سیلاب زدگان کی مدد اور امداد کے بجائے اپنا “پاور شو” دکھانے میں مصروف ہیں۔
ایک بیان میں سینیٹر شیری رحمان نےکہا کہ ملک بھر میں بارشوں اور سیلاب سے 1 ہزار سے زائد لوگ جاں بحق، ہزاروں زخمی اور لاکھوں کھلے آسمان تلے امداد کے منتظر ہیں۔ 3 کروڑ 30 لاکھ سے زائد لوگ سیلاب سے متاثر ہو چکے ہیں لیکن عمران خان سیلاب زدگان کی مدد اور امداد کے بجائے اپنا “پاور شو” دکھانے میں مصروف ہیں۔ پنجاب میں سیلاب متاثرہ علاقوں کا دورہ کرنے کے بجائے وہ صوبے میں جلسہ کر رہے ہیں۔ حکومت سیلاب متاثرین کو بچانے اور عمران خان اپنی سیاست میں مصروف ہے۔
شیری رحمان نے کہا کہ سوشل میڈیا پر تحریک انصاف کے لوگ تمام مقامی اور بین الاقوامی ڈونرز کو سیلاب متاثرین کیلئے حکومت کو فنڈ نہ دینے کی تلقین کرتے ہوئے اپنی تمام تر توانائی صرف کر رہے ہیں۔ جلسے میں پی ٹی آئی کے نمائندے اوورسیز پاکستانیوں کو اپیل کر رہے کہ سیلاب زدگان کی امداد کے لئے پیسے نہ بھیجیں۔ ہمیں اس وقت سیاست، مخالفت اور الزام تراشی کی نہیں، انسانی زندگیاں بچانے کی ضرورت ہے،اہل وطن سے اپیل ہے یہ سیاست و تقسیم کا نہیں، اس آفت میں متحد رہنے کا وقت ہے۔