اسلام آباد: مشیر خزانہ شوکت ترین کا کہنا ہے کہ شہروں کا متوسط طبقہ مہنگائی کا شکار ہے۔ کمپنیوں نے گزشتہ سال 950 ارب روپے کا منافع کمایا وہ ان مشکل حالات میں اپنے ملازمین کو بونس دیں ۔
اسلام آباد میں غیر سرکاری تنظیم ایس ڈی پی آئی کی سالانہ کانفرنس سے خطاب میں مشیر خزانہ شوکت ترین کا کہنا تھا کہ مہنگائی کا شکار شہری علاقوں کا متوسط طبقہ ہے ۔کمپنیوں نے کورونا کے باوجود بہت پیسہ بنایا ہے وہ منافع سے ملازمین کو حصہ دیں۔
مشیر خزانہ کا کہنا تھا کہ حکومت پائیدار شرح نمو بڑھانے کیلئے صنعتی شعبے اور زراعت میں بہتری کیلئے اقدامات کر رہی ہے۔ درآمدات میں اضافہ پٹرولیم مصنوعات اور اجناس کی قیمتوں میں عالمی منڈیوں میں اضافہ ہے۔
سیمینار سے خطاب میں وزیر اعظم کے معاون خصوصی سی پیک امور خالد منصور کا کہنا تھا کہ ایک سال میں سی پیک میں چالیس نئے سرمایہ کار لانے کا ہدف رکھا گیا ہے۔ معاون خصوصی خالد منصور کا کہنا تھا کہ چین کی ٹیکسٹائل آئی ٹی اور زراعت کی کمپنیوں کو پاکستان میں سرمایہ کاری کیلئے راغب کیا جا رہا ہے۔
