اسلام آباد: جمعیت علمائے اسلام ف کے سربراہ مولانا فضل الرحمن کا کہنا ہے کہ استحکام کے ذمہ داروں نے دھاندلیاں کرکے پاکستان کو غیر مستحکم بنایا۔ یہ دھاندلی کی پیداوار حکومتیں ہیں۔انہوں نے تھوڑا سا ہاتھ پیچھے کیا تو آپ نے خیبرپختونخوا کا نتیجہ دیکھ لیا۔
اسلام آباد میں ایک تقریب سے خطاب کرتے ہوئے مولانا فضل الرحمان نے کہا کہ ہم جمہوریت پسند ہیں اور مثبت سیاست کی بات کرتے ہیں۔ ہم پرامن سیاست، آئین اور مستحکم پاکستان کی بات کرتے ہیں۔پاکستان کو امن اور خوشحال معیشت کی ضرورت ہے۔
مولانا فضل الرحمن نے کہا کہ مدارس کے خلاف حکومت کی سطح پر سازشیں کی جارہی ہیں۔ انہیں پیار سے کہنا چاہتے ہیں کہ ان سازشوں سے باز آجائو کیونکہ آپ کبھی مدارس کو ختم نہیں کرسکتے ہیں ۔ یہ کہتے ہیں مدارس کو قومی دھارے میں لانا چاہتے ہیں۔ ہم قومی دھارے میں آنے کے لیے تیار ہیں آپ خود کو اسلامی دھارے میں لے آئیں۔ قومی دھارے سے ہم نہیں آپ باہر ہیں۔
