ایرانی وزارت خارجہ نے واشنگٹن پر زور دیا ہے کہ وہ قیدیوں کے تبادلےکو دو ہزار پندرہ کے جوہری معاہدے کی بحالی سے مت جوڑے۔ امریکہ متعدد بار ایران میں قید ایرانی نژاد امریکی شہریوں کی رہائی کا مطالبہ کر چکا ہے۔
ایران نے امریکہ پر الزام عائد کیا ہے کہ وہ تہران کے ساتھ دو ہزار پندرہ کے جوہری معاہدے کو بحال کرنے کے لیے بالواسطہ مذاکرات میں تاخیر کر رہا ہے اور یہ کہ قیدیوں کے تبادلے کا معاملہ واشنگٹن کے ساتھ مذاکرات سے منسلک نہیں تھا۔
امریکہ اور ایران کے درمیان سولہ ماہ تک بالواسطہ مذاکرات اور اس دوران یورپی سفارتکاروں کی فریقین کے ساتھ متعدد ملاقاتوں کے بعد یورپی یونین کے ایک سینئر عہدیدار نے آٹھ اگست کو کہا تھا کہ انہوں نے اس جوہری ڈیل کی بحالی کے لیے ایک حتمی پیشکش کر دی ہے اور یہ کہ انہیں اس بارے میں چند ہفتوں کے اندر جواب موصول ہونے کی توقع ہے۔
