پشاور: چیئرمین پیپلزپارٹی بلاول بھٹوزرداری نے کہا ہے کہ نااہل حکومت تین سالوں سے صرف مہنگائی لیکرآئے اورکچھ نہیں کیا۔حکومت نے تعلیم روزگار،معیشت اور بدعنوانی کے خاتمے کے لئے کسی ایک وعدے پرعمل درآمدنہیںکیا۔
پشاور میں ورکرز کنونشن سے خطاب کرتے ہوئے چیئرمین پیپلزپارٹی بلاول زرداری کا کہنا تھا کہ حکومت کا ہر ایک وعدہ جھوٹا، فراڈ اور دھوکا نکلا، یوٹرن پر یوٹرن لیا گیا۔ اس حکومت نے ایک کروڑ نوکریوں کا وعدہ کیا لیکن لوگوں سے نوکریاں بھی چھین لی۔ملک میں آج تاریخی مہنگائی اور بے روزگاری ہے یہ ٹرانسپرنسی انٹرنیشنل کہہ رہی ہے۔ عمران خان بڑی بڑی باتیں کرتے تھے۔کہتے تھے میں ہر بدھ کو اسمبلی میں آؤں گالیکن سب سے پہلے حکومت میں آکر انہوں نے اپنا گھر ریگولرائز کرا لیا۔
بلاول زرداری کا کہنا تھا کہ تبدیلی کا وعدہ کرنے والی حکومت نے 3 سالوں میں ملک کو تباہ کردیا۔اس حکومت نے تعلیم کے مواقع فراہم کئے اور نہ ہی روزگار کے۔ ملک بھر میں کرپشن میں تیزی سے اضافہ ہو رہا ہے۔ ہم نے وزیراعظم کو پہلے دن ہی سلیکٹڈ قرار دے دیا تھا۔ آج دنیا بھر میں وزیراعظم سلیکٹڈ کے نام سے مشہور ہیں۔ ہم خلوص دل کے ساتھ پیپلزپارٹی کے ہر مخالف کے پاس گئےلیکن دوست کہتے تھے استعفی دو الیکشن میں حصہ نہ لو لیکن ہم نے انکار کر دیا۔ ہم نے کہا تھا کہ عمران خان کے لئے میدان کھلا نہیں چھوڑیں گے۔ ہم نے ڈٹ کر اس کٹھ پتلی کے خلاف مقابلہ کیا۔ ضمنی انتخابات ہوئے تو جیت ہماری ہوئی۔
چیئرمین پیپلزپارٹی نے کہا کہ ہم عدلیہ پر حملہ کرنے والی جماعت تو نہیں ہیں نہ پارلیمان پر حملہ کرسکتے ہیں۔ ہم وہ جماعت نہیں جو دوسرے اداروں سے کہیں کہ انہیں نکالے۔ ہم نے کہا تھا کہ حکومت کو ہٹانے کیلئے صرف جمہوری طریقہ استعمال کریں گے۔آج عدم اعتماد نہ لانے کے خواہشمند ہمارا موقف دہرا رہے ہیں۔ اب ہم لانگ مارچ کر رہے ہیں تو یہ بھی کامیاب ہوگا۔ ہم نالائق حکومت کے خلاف 27 فروری سے عوامی مارچ کرنے جارہے ہیں، ہم اس شخص کے خلاف احتجاج کریں گے جس نے 50 لاکھ گھر دینے کا وعدہ کیا تھا، 8 مارچ کو ہم اسلام آباد میں ملیں گے۔
بلاول زرداری نے کہا کہ ہم نے حکومت کے خلاف اعلان جنگ کیا ہے۔ ہم نے ضیاء الحق، پرویزمشرف اور اب اس سلیکٹد حکومت کا مقابلہ کر رہے ہیں۔ ہم یہ مہم ناجائز اور نالائق حکومت کے خلاف چلا رہے ہیں، اور دیگر جماعتیں بھی ہماری حمایت کررہی ہیں۔عمران جس ادارے کی کاغذات لہراتاتھااسی ٹرانسپرنسی انٹرنیشنل نے موجودحکومت کوبدعنوان ترین قراردیا۔
