پاکستان نے سنسی خیز مقابلے کے بعد افغانستان کو شکست دیدی۔ نسیم شاہ نے لگاتار دو گیندوں پر دو چھکے لگا کر پاکستان شکست کو فتح میں بدل دیا۔ شارجہ میں کھیلے جانے والے ایشیا کپ کے سپر فور مرحلے کے اہم میچ میں افغانستان نے پاکستان کو جیتنے کے لیئے 130 رنز کا ہدف دے دیا۔ افغانستان کے اوپنرز کے انتہائی جارحانہ بلے بازی کی لیکن 36 رنز پر حارث رؤف نے رحمان اللہ گرباز کو آؤٹ کر دیا۔ محمد حسنین نے حضرت اللہ زازئی کو 43 رنز کے مجموعی اسکور پر آؤٹ کیا۔ افغانستان کی جانب سے تیسرے آؤٹ ہونے والے بلے باز کریم جنت تھے جو کہ 1 چوکے کی مدد سے 19 گیندوں پر 15 رنز بنا کر محمد نواز کی گیند پر فخر زمان کو کیچ دے بیٹھے، نجیب اللہ زدران 1 چھکے کی مدد سے 11 گیندوں پر 10 رنز بناکر شاداب خان کی گیند پر فخر زمان کے ہاتھوں کیچ آؤٹ ہوئے، ابراہیم زدران 37 گیندوں پر 35 رنز بناکر حارث رؤف کی گیند پر محمد رضوان کے کو کیچ دے بیٹھے، محمد نبی صفر پر نسیم شاہ کی گیند پر کلین بولڈ ہوگئے۔ بیس اوورز میں افغانستان نے 129 رنز بنائے اور پاکستان کو جیتنے کے لیئے 130 رنز کا ہدف دے دیا۔ پاکستان کی جانب سے حارث رؤف نے 26 رنز دے کر دو کھلاڑیوں کو آؤٹ کیا، نسیم شاہ، حسنین، نواز اور شاداب خان ایک ایک وکٹ لینے میں کامیاب ہوئے۔
پاکستان کی اننگزکے پہلے اوور کی دوسری ہی گیند پر بابر اعظم آؤٹ ہوگئے، انہوں نے اپنا کھاتہ بھی نہیں کھولا، 18 رنز کے مجموعے پر فخر زمان رن آؤٹ ہوگئے۔ 45 رنز پر پاکستان کو محمد رضوان کی صورت میں تیسرا نقصان اٹھانا پڑا، انہوں نے 20 رنز کی اننگز کھیلی۔ افتخار احمد اور شاداب خان نے چوتھی وکٹ کی شراکت میں ہدف کا تعاقب برقرار رکھا، اس دوران شاداب نے جارحانہ انداز اختیار کیا۔ دونوں نے 42 رنز کی شراکت قائم کی۔ 87 رنز پر افتخار احمد بڑا شاٹ کھیلنے کی کوشش میں آؤٹ ہوگئے انہوں نے 30 رنز بنائے۔ 97 رنز پر شاداب خان بھی آؤٹ ہوئے وہ 36 رنز بنانے کے بعد پویلین لوٹے۔ پاکستان کو چھٹا نقصان 105 رنز پر محمد نواز کی صورت میں اٹھانا پڑا، وہ صرف 5 رنز ہی بناسکے۔ 109 رنز پر خوشدل شاہ آؤٹ ہوگئے۔ 118 رنز پر آصف علی آؤٹ ہوگئے۔ اننگز کے آخری اوور میں پاکستان کو 11 رنز درکار تھے اور اس کی صرف ایک ہی وکٹ باقی تھی، کریز پر نسیم شاہ اور محمد حسنین موجود تھے۔ نسیم شاہ نے لگاتار 2 گیندوں پر 2 چھکے لگاکر پاکستان کی کشتی پار لگادی۔