سکھر: سندھ میں بلدیاتی انتخابات کا پہلا مرحلہ مکمل ہوگیا، پولنگ کا وقت ختم ہوگیا۔ ووٹوں کی گنتی کا عمل شروع ہوگیا ہے۔
تفصیلات کے مطابق سندھ میں بلدیاتی الیکشن کے پہلے مرحلے کے تحت 14 اضلاع میں پولنگ کے دوران دوران صوبے میں سکیورٹی سخت کی گئی، پولیس سمیت قانون نافذ کرنیوالے اداروں کی بھاری نفری تعینات رہی، کسی بھی ناخوشگوار واقعے سے نمٹنے کیلئے 40 ہزار سے زائد پولیس اہلکار تعینات کئے گئے ہیں، 42 ایس ایس پیز اور 82 ڈی ایس پیز بھی نگرانی کر رہے ہیں، کوئیک رسپانس کیلئے رینجرز کو اسٹینڈ بائی رکھا گیا، حلقوں میں اسلحہ کی نمائش پر پابندی عائد کی گئی، صورتحال خراب کرنے والوں کیخلاف فوری مقدمہ درج کئے جانے کے احکامات جاری کئے گئے۔
سندھ میں بلدیاتی انتخابات کے پہلے مرحلے میں پولنگ کے دوران پورا دن متعدد پولنگ اسٹیشن پر ہنگامہ آرائی بھی ہوئی۔ پولنگ کے دوران مختلف علاقوں میں دنگے فساد کے واقعات بھی پیش آئے۔ جس میں ایک شخص جاں بحق اور متعدد افراد زخمی ہو گئے۔
